భారత ఆర్థిక వ్యవస్థకు సవాళ్లు విసురుతున్న అంశాలలో వంట నూనెల దిగుమతి ప్రధానమైనది. ఏటా లక్ష కోట్ల రూపాయలకు పైగా విదేశీ మారక ద్రవ్యాన్ని మనం ఈ దిగుమతులకే ఖర్చు చేయాల్సి వస్తోంది. ఈ ఆర్థిక భారాన్ని తగ్గించి, దేశాన్ని స్వయం సమృద్ధి దిశగా నడిపించేందుకు తెలంగాణ ప్రభుత్వం రాష్ట్రానికి ఆయిల్ పామ్ హబ్ విజన్ ఇప్పుడు రికార్డుల స్థాయిలో ఫలాలను ఇస్తోంది. అత్యధిక ఆయిల్ ఎక్స్‌ట్రాక్షన్ రేట్ (ఓఈఆర్) సాధించడంతో పాటు, దిగుమతి సుంకాలు, ఆరోగ్యకరమైన వ్యవసాయంపై రాష్ట్రం దృష్టి సారించడం దేశ వ్యవసాయ భవిష్యత్తుకు కీలక మార్గదర్శకంగా నిలుస్తోంది.
తెలంగాణ పామాయిల్ రైతాంగం నిబద్ధత, రాష్ట్ర ఆయిల్ ఫెడ్ సాంకేతిక నైపుణ్యం కలగలిసి అంతర్జాతీయ ప్రమాణాలకు చేరువలో నిలిచాయి. భద్రాద్రి కొత్తగూడెం జిల్లాలోని అప్పారావుపేట కర్మాగారం గత పదేళ్లలో అత్యధికంగా 19.92 శాతం ఓఈఆర్ రికవరీని సాధించింది. ఈ ఘనత కేవలం ఫ్యాక్టరీకి మాత్రమే కాదు, నాణ్యమైన పంట అందించిన రైతులకు కూడా గొప్ప మేలు చేస్తుంది.
అత్యధిక ఓఈఆర్ సాధించడం అంటే, ప్రాసెసింగ్‌లో నూనె వృథా తగ్గడంతో పాటు, నాణ్యమైన గెలలను సరైన సమయానికి అందించిన రైతులకు ప్రయోజనం చేకూరుతుంది. ఈ అధిక రికవరీని బెంచ్‌మార్క్‌గా తీసుకుని పామాయిల్ ధరలను నిర్ణయిస్తారు. ఫలితంగా, కష్టపడి నాణ్యమైన దిగుబడి అందించిన రైతులకు మార్కెట్‌లో అధిక ధర లభిస్తుంది. అధికారులు సైతం నవంబర్ 1 ఫ్రూట్ ఇయర్ నాటికి ఈ రికవరీని పూర్తి 20 శాతానికి పెంచే లక్ష్యాన్ని పెట్టుకున్నారు.
రాష్ట్ర వ్యవసాయ శాఖ మంత్రి తుమ్మల నాగేశ్వరరావు ఈ విజయాన్ని ప్రశంసిస్తూ, రాష్ట్రంలో 10 లక్షల ఎకరాల ఆయిల్ పామ్ సాగు లక్ష్యాన్ని నిర్దేశించారు. ఈ విస్తరణ దేశ ఆహార భద్రతకు, ఆర్థిక భద్రతకు అత్యంత కీలకం. విస్తరణకు మద్దతుగా కొత్త ఫ్యాక్టరీల నిర్మాణంపై మంత్రి తుమ్మల హామీ ఇవ్వడం రైతులకు భరోసా కల్పిస్తోంది. రాష్ట్రంలో సాగు విస్తరించడం ద్వారా వంట నూనెల దేశీయ ఉత్పత్తి పెరిగి, లక్ష కోట్ల రూపాయల దిగుమతి భారం తగ్గింపు లక్ష్యానికి తెలంగాణ గట్టి పునాది వేస్తుంది.
పామాయిల్ సాగు విస్తరణ విజయం స్థిరంగా కొనసాగాలంటే, కేంద్ర ప్రభుత్వం విధానాలు స్థానిక రైతులకు అనుకూలంగా ఉండాలి. దిగుమతి సుంకాలు పెంచడం ఈ విషయంలో ప్రధాన భూమిక పోషిస్తుంది. దిగుమతి సుంకాలు పెంచడం వలన విదేశీ నూనెల ధర పెరుగుతుంది, దీని ఫలితంగా దేశీయంగా ఉత్పత్తి అయ్యే పామాయిల్‌కు మార్కెట్‌లో డిమాండ్, ధర స్థిరత్వం లభిస్తాయి. ధరల స్థిరత్వం, లాభాల భరోసా దొరికితేనే రైతులు సాగు విస్తరించేందుకు మరింత ఉత్సాహం చూపిస్తారు. రాష్ట్ర ప్రభుత్వం ఈ దిశగా కేంద్రంపై ఒత్తిడి తీసుకురావాల్సిన అవసరం ఉంది.
సాగు విస్తరణతో పాటు, ప్రజారోగ్యంపై తీవ్ర ప్రభావం చూపుతున్న ఒక అంశంపై మంత్రి తుమ్మల నాగేశ్వరరావు కీలక హెచ్చరిక చేశారు. యూరియా, పురుగు మందుల విచ్చలవిడి వాడకం వల్ల క్యాన్సర్ వంటి మహమ్మారి ప్రబలుతోందని ఆయన ఆందోళన వ్యక్తం చేశారు. పామాయిల్‌తో లాభాలను ఆర్జిస్తూనే, రైతాంగం తక్షణమే రసాయన వ్యవసాయం నుండి సేంద్రియ వ్యవసాయం వైపు మొగ్గు చూపాలని మంత్రి చేసిన పిలుపును రాష్ట్ర ప్రభుత్వం ఒక ఆరోగ్య మిషన్‌గా స్వీకరించాల్సిన ఆవశ్యకత ఉంది. అధిక ఓఈఆర్ సాధిస్తూ, ఆరోగ్యకరమైన ఆహారాన్ని అందించే లక్ష్యంతో తెలంగాణ ముందుకు సాగడం దేశ వ్యవసాయ రంగానికి గర్వకారణం. సాంకేతిక విధానాలను రాష్ట్రవ్యాప్తంగా విస్తరిస్తూ, స్థానిక రైతులకు రక్షణ కల్పించే విధానాలతో ముందుకు సాగితే, త్వరలోనే వంట నూనెల విషయంలో దేశం స్వయం సమృద్ధిని సాధించడం ఖాయం.