విభిన్నమైన టైటిల్‌తో, వాస్తవ సంఘటనల ఆధారంగా తెరకెక్కిన చిత్రం “మటన్ సూప్”. దర్శకుడు రామచంద్ర వట్టికూటి తన తొలి ప్రయత్నంలోనే ఒక రియల్ క్రైమ్ కథను సిల్వ‌ర్ స్క్రీన్‌పై ఆవిష్కరించి అద్భుతం చేశారు. “విట్‌నెస్ ది రియల్ క్రైమ్” అనే ట్యాగ్‌లైన్‌కు పూర్తి న్యాయం చేస్తూ, ఈ చిత్రం ప్రేక్షకులను రెండు గంటల పాటు ఉత్కంఠ ప్రపంచంలోకి తీసుకెళ్లింది.
కథ ఎలా ఉందంటే..
డబ్బు కోసం మనిషి ఎంతకైనా తెగిస్తాడు అనే పాయింట్ చుట్టూ అల్లిన ఈ కథ, ఊహకందని మలుపులతో సాగుతుంది. ఆస్తి కోసం కట్టుకున్న భర్తతోనే కలిసి, మరో వ్యక్తిని వివాహం చేసుకుని, అతడిని దారుణంగా హత్య చేసే పాత్రలో కథానాయిక నటన ఒళ్లు గగుర్పొడిచేలా ఉంది. సాక్ష్యాలు దొరకకుండా ఉండేందుకు మొదటి భర్త ముఖంపై యాసిడ్ పోసి, అతని రూపాన్నే మార్చేసే సన్నివేశాలు కథలోని క్రూరత్వాన్ని, తీవ్రతను తెలియజేస్తాయి. ఇంత పకడ్బందీగా అల్లిన నేరపు వల నుండి నిజం ఎలా బయటపడింది? “మటన్ సూప్” అనే సాధారణ వంటకం ఈ కేసులో ఎలా కీలకమైన క్లూగా మారింది? అనే అంశాలను దర్శకుడు చూపించిన తీరు అమోఘం.
నటీనటుల అభినయం
హీరో రమణ్, హీరోయిన్ వర్షా విశ్వనాథ్ తమ పాత్రలకు ప్రాణం పోశారు. ముఖ్యంగా నెగటివ్ షేడ్స్ ఉన్న పాత్రలో వర్ష నటన సినిమాకు ప్రధాన బలం. మిస్ట‌రీని చేధించే క్ర‌మాన్ని ఎస్సై పాత్ర చేసిన జెమినీ సురేష్ అద్భుతంగా చేశాడు. ఇక రమణ్ తన పాత్రలోని సంఘర్షణను అద్భుతంగా పండించారు. మిగిలిన నటీనటులు కూడా తమ పాత్రల పరిధి మేరకు పూర్తి న్యాయం చేశారు. ప్రతి ఒక్కరూ ప్రాణం పెట్టి పనిచేశారనడంలో ఎలాంటి సందేహం లేదు.
సాంకేతిక వర్గం పనితీరు:
దర్శకత్వం: ఒక నిజ జీవితంలోని క్రైమ్‌ను సినిమాగా మలచడం ఒక సవాల్. దర్శకుడు రామచంద్ర వట్టికూటి ఈ సవాల్‌ను స్వీకరించి, తన తొలి చిత్రంతోనే పూర్తి విజయం సాధించారు. ఒక సంక్లిష్టమైన కథను ఎక్కడా తడబడకుండా, చాలా స్పష్టతతో తెరకెక్కించారు. ప్రేక్షకుడు ఊహించేదానికి భిన్నంగా కథనాన్ని నడిపిస్తూ, చివరి వరకు సస్పెన్స్‌ను కొనసాగించడంలో ఆయన సక్సెస్ అయ్యారు.
నిర్మాణం:
నిర్మాతలు మల్లిఖార్జున ఎలికా (గోపాల్), రామకృష్ణ సనపల, అరుణ్ చంద్ర వట్టికూటి ఎక్కడా రాజీ పడకుండా సినిమాను నిర్మించారు. కథకు తగ్గ వాతావరణాన్ని, నిర్మాణ విలువలను అందించారు. వారి అభిరుచి స్క్రీన్‌పై స్పష్టంగా కనిపిస్తుంది.
సంగీతం:
ఇలాంటి క్రైమ్ థ్రిల్లర్లకు నేపథ్య సంగీతం ప్రాణం. వెంకీ వీణ అందించిన బీజీఎమ్ సినిమా స్థాయిని పెంచింది. ఉత్కంఠభరిత సన్నివేశాల్లో ఆయన సంగీతం వెన్నులో వణుకు పుట్టిస్తుంది.
మొత్తం మీద, “మటన్ సూప్” ఈ మధ్య కాలంలో వచ్చిన ఒక అత్యుత్తమ క్రైమ్ థ్రిల్లర్. థ్రిల్లర్ సినిమాలను ఇష్టపడే ప్రేక్షకులకు ఈ మూవీ ఒక పండగ లాంటిది. దర్శకుడి ప్రతిభ, నటీనటుల అద్భుత నటన, పకడ్బందీ స్క్రీన్‌ప్లే ఈ సినిమాను తప్పక చూడాల్సిన చిత్రంగా నిలబెట్టాయి.
రేటింగ్: 3.5/5