డబ్లిన్ (కాలిఫోర్నియా): తెలంగాణ డెవలప్మెంట్ ఫోరం (టీడీఎఫ్) సాంస్కృతిక విభాగం కళనిధి ఆధ్వర్యంలో తెలంగాణ కళలను, సంప్రదాయాలను కాపాడుతూ, భావి తరాలకు ఈ వారసత్వాన్ని చేరవేయాలనే లక్ష్యంతో బాటిక్ చిత్రలేఖన కళను ప్రోత్సహిస్తోంది.
ఈ కార్యక్రమంలో భాగంగా అమెరికాలోని కాలిఫోర్నియా రాష్ట్రం, డబ్లిన్ ప్రాంతంలో బాటిక్ హస్తకళా చిత్రాలను టిడిఎఫ్-యూఎస్ఏ వేదికపై ఆవిష్కరించారు. టీడీఎఫ్ యూఎస్ఏ అధ్యక్షుడు శ్రీనివాస్ మణికొండ, టిడిఎఫ్ ఇండియా అధ్యక్షుడు మట్ట రాజేశ్వర్ రెడ్డి ఈ ప్రదర్శనను ప్రారంభించారు. బాటిక్ కళాకారుడు రాజు యాసాల బాటిక్ హస్తకళ ప్రత్యేకతలను టిడిఎఫ్ సభ్యులు, ఎన్నారైలు ముందుంచి వివరించారు. తెలంగాణకు ప్రత్యేకమైన బతుకమ్మ, జానపద సంప్రదాయాలను బాటిక్ చిత్రాల్లో ప్రతిబింబించడం సంతోషకరమని టిడిఎఫ్ ప్రతినిధులు అభిప్రాయపడ్డారు. బాటిక్ హస్తకళకు జియోట్యాగింగ్ సదుపాయం కల్పించేందుకు టిడిఎఫ్ యూఎస్ఏ కృషి చేస్తుందని తెలిపారు.
టీడీఎఫ్ ఇండియా బాటిక్ కళాకారులు యాసాల ప్రకాశ్, మమత దంపతులను సత్కరించి, యువతకు బాటిక్ చిత్రలేఖనంపై శిక్షణ శిబిరాలు ఏర్పాటు చేయనున్నట్లు ప్రకటించింది.
బాటిక్ కళకు తెలంగాణ సాంస్కృతిక వారసత్వంలో విశిష్టమైన స్థానం ఉంది. సుమారు రెండువేల సంవత్సరాల క్రితం ఇండోనేషియా నుండి భారత్‌కి చేరిన ఈ కళను నందలాల్ బోస్ కుమార్తె శాంతినికేతన్‌లో పరిచయం చేసింది. 1966లో జగదీష్ మిట్టల్, కమలా మిట్టల్ దంపతులు ఈ కళను తెలంగాణకు తీసుకువచ్చారు.
తరువాత లక్ష్మాగౌడ్, సూర్యప్రకాశ్, గౌరీశంకర్, కాపు రాజయ్య, బాలయ్య వంటి కళాకారులు దీన్ని అభివృద్ధి చేశారు. వారిలో యాసాల బాలయ్య తనదైన శైలిలో బాటిక్ చిత్రకళకు 35 సంవత్సరాల సేవ చేశారు. ఆయన కుమారుడు యాసాల ప్రకాశ్ ప్రస్తుతం ఈ కళను కొనసాగిస్తూ భవిష్యత్తు తరాలకు ప్రేరణగా నిలుస్తున్నారు.
తెలంగాణ సాంస్కృతిక శాఖ ఆధ్వర్యంలో ఆయన ప్రదర్శనలకు మాజీ ముఖ్యమంత్రి కేసీఆర్ ప్రశంసలు లభించగా, ప్రస్తుత ముఖ్యమంత్రి రేవంత్ రెడ్డి లండన్ దావోస్ సమావేశంలో గౌతమ్ అదానీకి బాటిక్ పెయింటింగ్‌ను అందజేశారు.
సిద్దిపేటలో యాసాల మమత ఆధ్వర్యంలో సిద్దిపేట బాటిక్ సొసైటీ ద్వారా యువతకు బాటిక్ శిక్షణ ఇవ్వబడుతోంది. ఈ కళను విస్తృతంగా ప్రోత్సహించేందుకు saibatiks.com అనే వెబ్‌సైట్‌ను విజయదశమి (2025)న ప్రారంభించారు.
యాసాల ప్రకాశ్ ప్రస్తుతం తెలంగాణ గిరిజన గురుకుల పాఠశాలలో ఆర్ట్ టీచర్‌గా పనిచేస్తూ, గిరిజన విద్యార్థులకు బాటిక్ చిత్రలేఖనాన్ని బోధిస్తున్నారు.
