జగిత్యాల : రాష్ట్రంలోని ప్రాథమిక పాఠశాలలను బలోపేతం చేయాలంటే ప్రతి పాఠశాలకు ప్రధానోపాధ్యాయుల (పీఎస్‌ హెచ్‌ఎం) పోస్టులు మంజూరు చేయాలని తెలంగాణ గిరిజన ఉపాధ్యాయ సంఘం (టీజీయూఎస్) జగిత్యాల జిల్లా అధ్యక్షులు నునావత్ రాజు, ప్రధాన కార్యదర్శి జరుపుల గోవింద్‌లు ప్రభుత్వాన్ని కోరారు.
వారు ఆదివారం విడుదల చేసిన ప్రకటనలో మాట్లాడుతూ రాష్ట్రంలో కనీసం పది వేల పీఎస్‌ హెచ్‌ఎం పోస్టులు సృష్టించి, ప్రమోషన్‌ ద్వారా భర్తీ చేయాలని సూచించారు. ప్రాథమిక పాఠశాలలు విద్యా వ్యవస్థకు పునాది కాబట్టి ప్రతి తరగతికి ఒక ఉపాధ్యాయుడు ఉండేలా చర్యలు తీసుకోవాలని విజ్ఞప్తి చేశారు.
జీ.ఓ 317 కారణంగా ఇతర జిల్లాలకు బదిలీ అయి ఇబ్బందులు ఎదుర్కొంటున్న స్పౌజ్‌ ఉపాధ్యాయుల సమస్యను పరిష్కరించేందుకు ప్రభుత్వం చొరవ చూపాలని, ఇంకా మిగిలిపోయిన స్పౌజ్‌ ఉపాధ్యాయులకు కూడా బదిలీలు కల్పించాలని కోరారు.
అలాగే జీ.ఓ 317 బాధితులకు న్యాయం జరిగేలా చూడాలని, సమగ్ర శిక్ష ఉద్యోగుల సమ్మె కాలపు వేతనాలు వెంటనే విడుదల చేయాలని, వారి పెండింగ్‌ బకాయిలు, డీఎ లు చెల్లించాలని, కొత్త పీఆర్‌సీని అమలు చేయాలని ప్రభుత్వాన్ని విజ్ఞప్తి చేశారు. అలాగే టీచర్‌ ఎలిజిబిలిటీ టెస్ట్‌ (TET) పై మినహాయింపు కల్పించే దిశగా రాష్ట్ర ప్రభుత్వం చర్యలు తీసుకోవాలని వారు కోరారు.
https://www.globaltimes.tv/category/photo-gallery/