రియాద్ నుంచి కోమాలో ఉన్న సాఫ్ట్‌వేర్ ఇంజనీర్ లోకిని కృష్ణమూర్తిని విజయవంతంగా హైదరాబాద్‌కు తరలించే ఏర్పాట్లు పూర్తయ్యాయి. తెలంగాణ ప్రభుత్వం, సౌదీ అరేబియాలోని భారత రాయబార కార్యాలయం, గ్లోబల్ తెలంగాణ ఫోరం సమన్వయంతో ఈ మెడికల్ ఎవాక్యుయేషన్ సాఫల్యంగా సాగింది.
ఉమ్మడి కరీంనగర్ జిల్లా హుస్నాబాద్ నియోజకవర్గం ఎల్కతుర్తికి చెందిన లోకిని కృష్ణమూర్తి (35) సౌదీలో సాఫ్ట్‌వేర్ ఇంజనీర్‌గా పనిచేస్తున్నారు. గత జూలై 23న ఆయనకు అధిక రక్తపోటు కారణంగా మెదడులో రక్తనాళాలు చిట్లి కోమాలోకి జారిపోయారు. అప్పటి నుంచి రియాద్‌లోని ఎస్ఎంసీ ఆసుపత్రిలో వెంటిలేటర్‌పై చికిత్స పొందుతున్నారు.
మంత్రి పొన్నం ప్రభాకర్ ప్రత్యేక చొరవతో, తెలంగాణ ప్రభుత్వం సౌదీలోని భారత రాయబార కార్యాలయంతో సంప్రదింపులు జరిపి కృష్ణమూర్తిని భారత్‌కు తీసుకురావడానికి చర్యలు చేపట్టింది. సౌదీ లోని గ్లోబల్ తెలంగాణ ఫోరం అధ్యక్షులు మహ్మద్ జబ్బార్ సమన్వయ బాధ్యతలు నిర్వర్తించారు.
పెషెంట్ తరలింపునకు వైద్య బృందం పర్యవేక్షణలో సౌదీ ఎయిర్‌లైన్స్ ప్రత్యేక విమానంలో స్ట్రెచర్‌పై మెడికల్ ఎవాక్యుయేషన్ చేపట్టారు. ఆయనతో పాటు భార్య తెనుగు అశ్విని కూడా ప్రయాణిస్తున్నారు. సోమవారం ఉదయం హైదరాబాద్ చేరుకున్న వెంటనే కృష్ణమూర్తిని దక్కన్ హాస్పిటల్ లో చేర్పించనున్నారు.
గత నెల 9న కృష్ణమూర్తి తండ్రి సూరయ్య, సహాయం కోరుతూ ‘సీఎం ప్రవాసీ ప్రజావాణి’లో వినతిపత్రం సమర్పించగా, తెలంగాణ ప్రభుత్వ ఎన్నారై అడ్వైజరీ కమిటీ వైస్ చైర్మన్ మంద భీంరెడ్డి మార్గదర్శకత్వంలో ఈ చర్యలు చేపట్టారు.
ఈ చర్య పట్ల తెలంగాణ ప్రవాసీ వర్గాలు మంత్రి పొన్నం ప్రభాకర్, ప్రభుత్వానికి కృతజ్ఞతలు తెలియజేశాయి.