తెలంగాణ రాష్ట్ర బంద్‌కు సిపిఎం సంపూర్ణ మద్దతు

• బీసీ జేఏసీ ఐక్య కార్యాచరణ

హైదరాబాద్, అక్టోబర్ 14, 2025: బీసీ రిజర్వేషన్ల అమలు కోసం ‘బీసీ జాయింట్ యాక్షన్ కమిటీ’ (బీసీ-జేఏసీ) ఈ నెల 18న ‘బంద్ ఫర్ జస్టిస్’ పేరిట తలపెట్టిన తెలంగాణ రాష్ట్ర బంద్‌కు సిపిఎం రాష్ట్ర కార్యదర్శి జాన్ వెస్లీ సంపూర్ణ మద్దతు ప్రకటించారు. ఈ బంద్‌లో సిపిఎం ముందు వరుసలో నిలిచి పోరాడుతుందని ఆయన స్పష్టం చేశారు. బీసీ రిజర్వేషన్ల విషయంలో స్పష్టమైన విధానంతో పనిచేయాలని సిపిఎం నేతలు సూచించారు.

మంగళవారం ఉదయం హైదరాబాద్‌లోని ఆర్టీసీ క్రాస్ రోడ్స్‌లో గల సిపిఎం రాష్ట్ర కార్యాలయంలో బీసీ జేఏసీ నేతలు జాన్ వెస్లీని కలిసి బంద్‌కు మద్దతు కోరుతూ లేఖ అందజేశారు. ఈ సందర్భంగా బీసీ జేఏసీ చైర్మన్ ఆర్. కృష్ణయ్య, వర్కింగ్ చైర్మన్ జాజుల శ్రీనివాస్ గౌడ్, కో-చైర్మన్ రాజారాం యాదవ్, కోఆర్డినేటర్ గుజ్జ కృష్ణ తదితరులు పాల్గొన్నారు.

బీసీల జీవన్మరణ సమస్య: బీసీ జేఏసీ నేతలు మాట్లాడుతూ, రిజర్వేషన్ల అమలు బీసీలకు జీవన్మరణ సమస్యగా మారిందని, ప్రస్తుత వ్యవస్థలు బీసీలకు వ్యతిరేకంగా పనిచేస్తున్నాయని ఆరోపించారు. బీసీ జేఏసీ వైస్ చైర్మన్ విజిఆర్ నారగోని, వ్యవస్థల నుంచి బీసీలకు న్యాయం జరగడం లేదని విమర్శించారు. రాజారాం యాదవ్ మాట్లాడుతూ, బీసీల హక్కుల కోసం న్యాయబద్ధమైన ఈ పోరాటంలో పార్టీలకతీతంగా అందరూ ఐక్యంగా పాల్గొనాలని పిలుపునిచ్చారు.

వివిధ సంఘాల మద్దతు: ఈ కార్యక్రమంలో బీసీ జేఏసీ కోఆర్డినేటర్ కుల్కచర్ల శ్రీనివాస్, తెలంగాణ జర్నలిస్టుల ఫోరం రాష్ట్ర ప్రధాన కార్యదర్శి మేకల కృష్ణ, యాదవ హక్కుల పోరాట సమితి జాతీయ అధ్యక్షుడు మేకల రాములు యాదవ్, వడ్డెర సంఘం జాతీయ అధ్యక్షుడు పిట్ల శ్రీధర్‌తో పాటు వివిధ బీసీ, కుల సంఘాల నాయకులు పాల్గొన్నారు.

ఈ బంద్‌ ద్వారా బీసీ రిజర్వేషన్ల అమలు కోసం ఒక బలమైన సందేశాన్ని ప్రభుత్వానికి అందించాలని బీసీ జేఏసీ నేతలు పిలుపునిచ్చారు. ఈ పోరాటం బీసీల హక్కుల సాధన కోసం కీలకమైనదని, అందరూ సంఘీభావంతో పాల్గొనాలని వారు కోరారు.